නිලාගෙ පත්තර පිටුව

වැරැද්ද කොතැනද ?????????

2010-10-02T17:43:00.003+05:30

කිරුලු පලන්දන රටක් නැති
රට කරවන්නට පුතෙකු නැති
අතීතයක් මිස හෙටක් නැති
මිනිසෙක් තනනා මාළිගා....

මරු 119

2010-09-26T21:11:00.002+05:30

අපරාධයක් දුටු සැනින් වහාම අමතන්න යනුවෙන් මග දිගටම බෝඩ් ගසා ඇති අංක 119 ඒ බෝඩ් ලැල්ලටම පමනක් සීමිත එකක් දැයි විමසීමට මෙය සටහන් කරමි. ඊට හේතුව අද දින රාත්‍රී 9.00 ට පමණ මා ඥාතියෙකු ගේ නිවසට ගොස් පැමිනෙමින් සිටියදී මා ඉදිරියේ ගිය වාහනය හදිසියේ නතර කල අතර ඉදිරියේ යම් කලබලයක්ද දක්නට ලැබුනා. මට වාහන 2කට පෙර තිබු ලොරි රථයකට පොලු ආදිය රැගත් පිරිසක් පහරදෙනු දක්නට ලැබුනු අතර එහි රියදුරුද රථයෙන් එලියට ඇද ඔහුටද පහරදුන් අයුරු මා මෙන්ම මාර්ගය අවහිරවීම නිසා රැඳී සිටි සියලුම දෙනාද දකින්නටත් ඇති. එහි හදිසි අනතුරක් නොවූ අතර එය සංවිධානය වී මග රැක සිට කරන ලද "ගේමක්" බවත් හොඳින් පෙනුනා. හේතුව කුමක්වුවත් පොලිසියට දැන්වීම යුතුකමක් සේ සලකා එවෙලේ සිට එසැනින් අමතන 119 ට එම ස්ථානයේ සිට තවත් කි.මී 2ක් පමන එනතෙක්ම ඇමතීමට උත්සාහ කලද කිසිම ප්‍රතිචාරයක් නොමැති විය. කලහකාරීන්ට අර ලොරි රථයේ රියදුරා මරාදැමීමට වුවත් කල්ඇති නිසා එසැනින් අංකයට ඇමතීම මම පසුව අතහැර දැම්මෙමි.
ඉතිං යුද්දෙට නැති කඩුව කොස් කොටන්නද කිව්ව වගේ මේ හදිසි ඇමතුම් අංක වල ප්‍රයෝජනය කුමක්ද? යුද්දෙ ඉවරවුනත් එක්කම ඒවත් ඉවරද?

කමෝන් මූන්.... මේ ගැනත් කොමිසමක් දාමුද?

2010-07-30T21:45:00.001+05:30

සිංහලේ පින්බර පොලොව මම සිඹිම්!!!

2010-05-18T16:52:00.003+05:30

ශ්‍රී ලංකාව යලිත් නිදහස් නිවහල් දේශයක් කිරීමට එඩිතර වු යුගයේ විරුවනි, ඔබට මාගේ හෘදයාංගම ආචාරය !!!

කටුසු පිළිහුඩු මෙහෙයුම !!!

2010-04-24T18:19:00.012+05:30

මාස දෙකකටත් වැඩි කාලයක් මගේ බ්ලොගේට මොකුත්ම ලියන්න බැරිඋනා. හේතුව මොකුත් නෙමෙයි ලියන්න දෙයක් නැතිකමමයි. අද විශේෂ දෙයක් වෙච්ච නිසා ඒක ලියන්නයි මේ හදන්නෙ. මේකයි සිද්දිය.

අපේ ගේ ලඟ කණ්ඩියේ පිළිහුඩු ජෝඩුවක් පදින්චි වෙලා ඉන්නවා. මේ ඩබලගෙ පැටවු ටික අද අපි කවුරුත් ගෙදර නැතිවෙලාවෙ පිළිහුඩු අම්මයි තාත්තයි පියාසර මෙහෙයුමට එලියට අරගෙන. මේ පැටවුන් ගෙන් එක පණ්ඩිතයෙක් Flying Mission එක පැත්තක තියෙද්දි දඩයමේ ගිහින්. මේකා කොහොම හරි ලොකු පිළිහුඩුවෙක් වත් එක සැරේ නොකන සයිස් කටුස්සෙක් අල්ලගෙන ගෙඩිය පිටින්ම ගිලලා. කටුස්ස මේ යකාටත් වඩා දිග එකෙක් නිසා කොල්ල අමාරුවෙ.
අපි ගෙදර එනකොට ගේ පිටිපස්සේ එක යුද්දයයි. මහ ජෝඩුව විලාප තියනව. මේ යකා කටුස්සව වලිගෙට එනකම්ම ගිලලා. වලිගෙන් අඩි බාගයක් විතර හොටෙන් එලියෙ. බෙල්ල ලඟ ඉඳන් පෙඳේ ලඟට යනකං බැලුම වගේ පිම්බිල. පියාඹන්න තියා ඇවිදින්නවත් බෑ.
පරන glove දෙකක් හොයාගෙන මමත් Operation එකට බැස්ස. පොඩි එකෙක් නිසා වැඩිය තද කරල අල්ලන්නත් බැහැ. කොහොම හරි පැට්ටගෙ පෙඳේ ලඟ ඉඳන් උඩහට තෙරපන ගමන් කටුස්සගෙ වලිගෙන් අල්ලලා හෙමින් හෙමින් ආපහු ඇද්ද. කටුස්ස ගැන නං කියන්නත් කනගාටුයි උගේ වලිගෙනං තුනකට කැඩුනා. තුන්වෙනි සැරේ නැට්ට මුලින්ම කැඩෙනකොට දෙයියන්ගෙ පිහිටෙන් යන්තං පස්සෙ කකුල් දෙක එලියට ආවා. නැත්තං බඩුම තමා. ඔය කටුසු මෘතශරීරෙ එහා පැත්තෙන් තියෙන්නෙ කැඩුනු වලිග කෑලි තමයි.
විනාඩි 10ක් විතර try කරල යන්තං කටුස්සව එලියට ගත්ත. අපරාදෙ කියන්න බැ මහ පිළිහුඩු ජෝඩුව Operation එක වෙලාවෙනං හ්ම්.. නොකිය අත්තක් උඩට වෙලා බලාහිටිය. වැඩේ ඉවර වෙලා පැය කාලක් විතර මේ පැංචා ඔය ඉන්න විදිහට වාඩිවෙලා හිටිය ඒ අතරෙ තමයි මේ පිංතූරෙ ගත්තෙ. ඊට පස්සෙ මෙයා පයින්ම යන්නයි සූදානං උනේ. ඒ ගමන ආයෙත් අල්ලගෙන දෙතුන් සැරයක් උඩ දැම්මම තටු ගහල සිග්-සැග් ක්‍රමේට අම්ම තාත්තගෙ කටහඩ දිහාට පියෑඹුව.
ඕන්න ඕකයි කටුසු පිළිහුඩු කතා වස්තුව.

කලට වෙලාවට නොකිව්වත්, කටුස්සාට සුභ නොවූවත්, පිළිහුඩු පැටියා ඇතුලු ඔබ සැමට ලැබුවා සිංහල අලුත් අවුරුද්ද සුභ අලුත් අවුරුද්දක් වේවා !!!

සමරමු නිදහස නිදහසේ...

2010-02-04T10:39:00.002+05:30

සමරමු නිදහස නිදහසේ...

අප්‍රමාන සංතෝසයි

2010-01-28T13:56:00.007+05:30

සංතෝසයි සංතෝසයි අප්‍රමාන සංතෝසයි. මොකවත් නිසා නෙමෙයි. සහෝදර සමාගමේ නායක මහින්ද රාජපක්ෂ ජනාධිපතිතුමාගේ ජයග්‍රහනය ගැන. ඒ කියන්නෙ රනිල්, මංගල, සෝමවංශ, සම්බන්දන් සහ අන්තිමට චන්ද්‍රිකාත් ඇතුලලු කූට තක්කඩි රැලේ අවස්ථාවාදී නාටකය අසාර්ථක වීම ගැන. ඉහල යෑමේ අසීමිත ආසාවෙන් කන්න දීපු අත හපාකා පලාගොස් ඉහත කී කපටි රැලේ උගුලේ හසුවු SF ගැන නම් අපට කේන්තිය මුසුවූ ඉතාම සුලු කනගාටුවක් ඇත. කනගාටුව,මොන දුර්වලකං තිබුනද ත්‍රස්තමර්ධන සටනට නායකත්වයක් දුන් පුද්ගලයෙක් බැවිනි. කේන්තිය, අවසානයේ තම පටු අරමුණු වෙනුවෙන් රටට,රජයට සහ හමුදාවට ද්‍රෝහී ලෙස කටයුතු කල බැවිනි.
අවසානයේ රටේ බහුතරයක් ජනතාවට Beyond Frame ගේ ප්‍රජාතන්ත්‍රවාදයද, සංවිධායක නිතීඥතුමාගේ මහා බලවේගයද, Taboo ගේ මහප්‍රානද, පුලාගේ අතිවිශේෂද, The Indipendent ගේ සුපිරිසිදු හෙලිදරව්ද කනකට ගෙන නොමැතිබව ඔවුන් පිලිගත යුතුය. ලාංකීය ජනතාව තවමත් ඒකීය රාජ්‍යයකට මනාප බවත්,ෆොන්සේකා කියන පරිදි යුද්ධය දිනුවේ තමාය, ආන්ඩුව කකුලෙන් ඇද්දේය යන්න ගල් ටොපියක් බවත්,සම්බන්දන් කැලය මාරු කලාට පුල්ලි මාරුවී නැති බව ජනතාව පිලිගන්නා බවත්,මංගල,රනිල්,තිස්ස,රවී,කිරිඇල්ල ප්‍රමුඛ එජාපයේ ටොම්පච ඔවුනට ස්වයං වින්දනයක් පමනක් වී ඇති බවත්, සෝමවංශලාගේ,අනුරකුමාරලාගේ පුහු තර්ක සහ තර්ජන වලට ජනතාව ආකර්ෂනය නොවන බවත් මේ ඡන්දයෙන් පෙනීයයි. රනිල්ට මෙය ජනමත විචාරනයක් බැවින් මේ ප්‍රතිපලය කෙසේ විග්‍රහ කරයිද යන්න කිව නොහැක.නමුත් ඔහුගේ අවශ්‍යතාවය එජාපයේ නායකකම නම් මෙවරත් බේරුනි.

තමාව ගොනාට ඇන්ඳූ බව වැටහුනු කල ෆොන්සේකා මොනවයින් මොනවා කරයිදැයි කිව නොහැක. නිර්පාක්ෂිකයෙකුය කියන බැවින් ඔහුට පක්ෂවලින් වගකීමක්ද නැත. නිකාං සවුත්තු වු බැවින් කලින් තිබූ ගෞරවයද මහජනයාගෙන් නැවත බලාපොරොත්තු විය නොහැක. ලිඳේ වැටුන නිසා ලිං කටින්ම ගොඩ ඒමට උත්සාහකල හැක. නමුත් එකෙන්ම රජකමටම නගින්න ගිය නිසා ප්‍රාදේශීයසභා,නගරසභා,පලාත්සභා හෝ පාර්ලිමේන්තු මංත්‍රී හෝ ඇමති කමක් සඳහා ඉල්ලීමද මදිකමක් ලෙස සිතන්නටද පුලුවන. එතුමාට මාණ්ඩලික ප්‍රධානී තනතුරද, අමාත්‍යාශ ලේකම් තනතුරද මදිවූයේ බලතල මදිනිසා බව නොරහසකි. එක්කෝ 2017දී නැවත ජනාධිපති තනතුරට ඉල්ලිය යුතුය. ඒත් එජාපයෙන් ඉල්ලීම හෝ සහය ගැනීමට නොහැක. ඒ රනිල් අනිවාර්යයෙන්ම ඉල්ලන බැවිනි. ජවිපෙන් ඉල්ලා දිනන්නට බැරිය. නැතිනම් පක්ෂයක් හදාගෙන..ම්ම්ම්ම්ම්. කෙරෙන්නෑ කෙරෙන්නෑ. ලියන එකත් අපරාදයක්.තමාට ඡන්දයක් නැතිබව තම පාක්ෂිකයන්ට වසංකල මේ සුපිරිසිදු මිනිසා, තමන්ට යම් චෝදනාවක් කල විට පාහරයා/අවලමා ලෙස කෝපයෙන් බැනවදින මේ යහපාලකයා, රටේ සල්ලිවලින් තම නෑයන් සමග බිස්නස් කල මේ දූෂනයට තිත තබන්නාගේ ඊලඟ පියවර ගැනද අප විමසිල්ලෙන් බලා හිඳිමු.
කෙසේ හෝ ඉදිරි වසර කීපයේදී අප භාවිතාකල ඡන්දයේ ප්‍රතිපල දැකගැනීමට හැකිවනු ඇත. ඒ ජනාධිපතිතුමා කියූ පරිදිම සහ අප පැතූ පරිදිම සුභ අනාගතයක්ම වේවා !!!!

කළකිරීම

2010-01-23T19:47:00.004+05:30

මිනීමරු කොටි ත්‍රස්තවාදයෙන් රට නිදහස් කරගැනීමේ උත්සාහයේදී අප ඊට පක්ෂව සිටිමින් මහින්ද රාජපක්ෂ මහතාට සහ රජයට අපගේ උපරිම සහයෝගය දුන්නෙමු. එපමනක්ද නොව එවකට හමුදාපතිව සිටි සරත් ෆොන්සේකා මහතාටද එල්ලවූ චෝදනා වලට විරුද්ධව මෙම බ්ලොග් අවකාශය තුල අපට හැකි පමනින් කටයුතු කලෙමු. බොහෝ විට සුලු ජාතික අයිතිවාසිකම් වෙනුවෙන් අසාධාරන ලෙස සිංහලයන්ට කෙරෙන චෝදනාවලට සහ යමෙක් සිංහලයන් හෝ බෞද්ධයන් වෙනුවෙන් වචනයක් කතාකලහොත් එම බ්ලොග්කරු හෝ වෙනත් පුද්ගලයා ජාතිවාදියෙකු ලෙස බෙරිහන්දීමට සමහරක් බ්ලොග්කරුවන් කටයුතුකිරීමට විරුද්ධව එලිපිටම ප්‍රබලව කටයුතු කලෙමු. කෙසේ හෝ අවසානයේ අතිමහත් බහුතරයක් ශ්‍රී ලාංකිකයින්ගේ බලාපොරොත්තුව ඉටුකරමින් ප්‍රභාකරන් ප්‍රමුඛ කොටිරැල රටෙන් තොලොන්චි විය.
මෙය එතෙක් යුද්ධය මුවාවෙන් තම මඩි තරකරගත් දේශීය විදේශීය කොමිස් කාක්කන්ට, කුලී ලියන්නන්ට සහ NGO නඩයට මරු පහරක් බව නොරහසකි. රටේ ජනතාව කටපියාගෙන සිටියදීත්, කොටින් සිරකරගෙන සිටිවුන් තමාව බේරගන්නා ලෙස රජයට කියද්දීත් ඉහත කී නඩය මානව හිමිකම් සහ සුලු ජාතිකයින්ටත් නැති තරම් රුදාවකින් සුලු ජාතික අයිතිවාසිකම් වෙනුවෙන් වැලපුනෝය. නමුත් මොකා කුලියට කෑ ගැසුවද, කවුරු බලපෑම් කලද සේනාධිනායක ජනාධිපති මහින්ද රාජපක්ෂ මහතා කොන්ද කෙලින් තබාගෙන කටයුතු කර ආශ්චර්යමත් අභිමානයක් සහ නිදහසක් අපට ලබා දුන්නේය.

මෙකී ජයග්‍රහනයට නායකත්වය දීම නිසා මහින්ද රාජපක්ෂ මහතා වටා ගොඩනැගුනු ජනතා ප්‍රසාදය දිරවාගත නොහැකිවූ යුද්ධය අවසාන වෙන තෙක් එයට අකුල්හෙලූ, රනිල් සහ ඔහුගේ යහලුවන්ද, වර්ජන කර කුජීත වූ සෝමවංශ, ලාල්කාන්ත සහ JVP කල්ලියද යලි ඔලුව ඉස්සීමට පොටක් පාදාගැනීමට එහෙ මෙහෙ දුවද්දී බලය ලබාගැනීමට ඕනෑම දෙයක් කිරීමට හැකියාවක් ඇති ඒ වනවිට යුද ජයග්‍රහනය නිසා ජනප්‍රියත්වයේ හිනිපෙත්තේ සිටි, තම තුන් ලක්ෂයක හමුදා සිහිනය බොඳවී රජය ගැන ක්‍රෝදයෙන් සිටි සරත් ෆොන්සේකාව තම අදහසට නම්මා ගැනීමට මෙම කල්ලි සමත් විය.

කෙසේ වුවද රටට මෙතරම් සේවයක් කල මහින්ද රාජපක්ෂ මහතාට තව දුරටත් තම දේශපාලන බලය රඳවාගැනීමට කිසිම තරඟයක් ඇති නොවේයැයි යන අපගේ සිතුවිල්ල 100% නිවැරදි නොවන බැව් දැන් දැන් පසක්වෙමින් පවතී. කලගුන දත් බොහෝ පිරිස් මහින්ද රාජපක්ෂ මහතාට සහයෝගය දුන්නද, කෙතරම් යුද්ධයට අකුල්හෙලුවත් රනිල්,මංගල,සෝමවංශ සහ අලුතින්ම ඊට එක්වූ සම්බන්ධන් ප්‍රමුඛ TNA කල්ලියට සැලකියයුතු ජන්ද ප්‍රමානයක් එකතුවී තිබෙනබව අප පිලිගත යුතුය. ඒ විචාරයකින් තොරව UNP නායකත්වය කියනදෙයක් කරන UNP පාක්ෂිකයන් නිසා සහ මහින්ද පරාජය කර තමන්ට යම් පෞඩත්වයක් ලැබේයැයි සිතන UNP පාක්ෂිකයන් නිසාය. JVPය මෙහිදී තීරනාත්මක නොවේයැයි මගේ හැඟීමයි. TNA සංවිධානය මීයක් කඩන්නේ අතලෙවකෑමට නොවේයැයි තේරුම්ගැනීමට සරත් ෆොන්සේකාට ඡන්දය දීමට සිටින ඡන්දදායකයන්ට නොතේරීම රටේ අභාග්‍යයයි. මෙම ජනාධිපතිවරනයේදී මහින්ද මහතා දිනවීමට බ්ලොග් අවකාශය තුල අප විසින් එතරම් බරක් නොයොදන ලද්දේ නිදහසේ ජීවත්වීමේ සැහැල්ලුව රටේ සමස්ථ ජනතාවටම අවබෝධවී එම නිදහස රැකගැනීමට කටයුතුකරනු ඇතැයි සිතූ බැවිනි. නමුත් සිංහලයාගේ මතකය බොහෝ කෙටිබව නැවත නැවතත් පසක්කරමින් මහා මිලක් ගෙවා ලබාගත් අභිමානවත් නිදහස මුදලට,කුහකකමට සහ මෝඩකමට නින්දිත ලෙස පාවාදීමට සමහරු කටයුතුකරමින් සිටිති.
මහින්ද මහතාගේ ජයග්‍රහනය ගැන අපට සැකයක් නැත. අපට කනගාටුව වී ඇත්තේ ලංකාවේ සමස්ත ජනතාවම එකම තීරනයක සිටින බවට ලෝකයාටද පෙන්වීමට තිබූ ඉතා හොඳ අවස්තාවක් අහිමිවීමයි.

මේ ලිපිය පලකිරීමට සිතුනේද අපට රටක් දිනාදුන් නායකයාට, ඊට සියලුම ශක්තිය දුන් ආරක්ෂක ලේකම්තුමාට,යුධ පිටියේ ජයකෙලි නැංවූ රණ විරුවන්ට නින්දිත ලෙස පහරගසන නිදහස් සටනට සැමදා ද්‍රෝහිකම් කල රනිල්,රවී,කිරිඇල්ල,මංගල වැනි දේශපාලන වැසිකිලි සහ ඉතිරිව ඇති කොටිත්‍රස්තයන් වන මනෝගනේශන්,සම්බන්ධන් සමග සරත් ෆොන්සේකාට සහය දීමට ඉදිරිපත්ව ඇති ශ්‍රී ලාංකියයන් යැයි හැඳින්විය නොහැකි ගුණමකු සාමාන්‍ය ඡන්දදායකයන් පිරිස ගැන කිව නොහැකිතරම් කලකිරීමෙනි.

වෛරසයක් වූ ලංකා කොඩිය

2010-01-09T16:43:00.002+05:30

Windows Paint පසුබිම මත ක්‍රියාත්මක වන ශ්‍රී ලංකා ධජය නිර්මානය කරනු ලබන Virus එක ඉවත්කරන්නේ කෙසේද? දන්නා කවුරුන් හෝ සිටීනම් කරුණාකර උපදෙසක් දෙන්න. මෙය තවමත් මගේ System එකට පැමින නැත. නමුත් මගේ යහලුවන් කීප දෙනෙකුටම මේ තැග්ග ලැබී තිබේ. Boot වීමේදී ආරම්භ වී විනාඩි 10ක් පමන ශ්‍රී ලංකා ධජය Windows Paint මත අඳින මෙය ඉන් පසු නව Desktop එකක් නිර්මානය කර ගනිමින් Animated ලංකා ධජය කොනකට එක්කරමින් ක්‍රියාත්මක වේ. වේගය අඩාල වීම සහ එමගින් පද්ධතිය හරිආකාරව ක්‍රියා නොකිරීම මෙහි අතුරුපලයි. චිත්‍රය අඳින අතරතුර මවුසය සහ KeyBOard ක්‍රියාකිරීමද ඇනහිටී. End Task කිරීම ඉඳ හිට වැඩකරයි. නමුත් අතුරුපල නැති නොවේ. Virus Gard වලට තවමත් හසුවී නැතිබවද කිවයුතුය. දැනුමැත්න්ටයි මේ ඉල්ලීම.....

හා හා බලාගෙනයි !!!

2010-01-04T21:48:00.003+05:30

ඔන්න මගෙනං වරදක් නෑ. මම මෙයාට කිව්ව උඩ නගින්න එපා කියල කෝ ඇහුවද. මගේ බාරෙ ඉන්නකොට වැටුනොත් මම එපායැ වගකියන්න. බලන් ඉන්න බැරිම තැන තමා මමත් ලඟට ගියේ.

මේ කොයි යන්නේ.. නැත අප දන්නේ...

2009-12-15T22:15:00.003+05:30

Sunday Leader පුවත සම්බන්ධයෙන් සරත් ෆොන්සේකා මහතාගේ පැහැදිලි කිරීමේ පුවත්පත් සාකච්ඡාව ගැන අප බොහෝ සේ සතුටු වූයෙමු. ඒ සත්‍ය වශයෙන්ම Sunday Leader පුවත්පතේ පැටිකිරිය සහ එහි ක්‍රියාකලාපය කා සඳහාද යන්න හොඳින් දන්නා බැවිනි. නමුත් එහි කතෘ සරත් ෆොන්සේකා මහතා කියන පරිදි එම පුවත නිවැරදි කිරීම දැඩි ලෙස ප්‍රතික්ෂේප කිරීම නිසාත්, එම පුවතෙහි ඇත්තේ සරත් ෆොන්සේකා මහතාගේ වචනම බව සහතික කොට කීම නිසාත් සහ ඒ ගැන ෆොන්සේකා මහතා තවමත් නිහඬ නිසාත් එතුමා මේ යන්නට හදන ගමන ගැන අපට දැඩි සැකයක් මතුවී තිබේ.

සරත් ෆොන්සේකා මහතාගේ දේශපාලන ආගමනය ගැන මහින්ද රාජපක්ෂ මහතාගේ දේශපාලන කඳවුරේ වැසියන්ට යම් සිත් බිඳීමක් හා තිගැස්මක් ඇතිවී තිබූ බව සත්‍යයකි. ඒ ගසට පොත්ත සේ එකට බැඳී සිටි ෆොන්සේකා මහතාට රජයෙන් යම් අසාධාරනයක් වීම නිසා එතුමා ඉවත්වීයැයි යන කුකුස නිසාය. නමුත් කල්යාමේදී ඒ කුකුස යම් තරමකට සමනය වූයේ ඔහු ඡන්දයෙන් පැරදුනද ඔහුගේ මෙතෙක් කල් තිබූ පෞඩත්වය සහ ජාතිකවාදීත්වය නිසා රනිල් ප්‍රමුඛ බටහිර ඒජන්තලාට හෝ පෝස්ටර්කාරයින් පමණක් වූ JVPයට හෝ අවශ්‍ය පරිදි නැටවෙන රූකඩයක් නොවනු ඇතැයි යන සිතුවිල්ල නිසාය.

නමුත් සරත් ෆොන්සේකා මහතාගේ අප මෙතෙක් නුදුටු පැතිකඩක් දැන් අනවරණය වෙමින් පවතී. දේශපාලකයන් ගැන දැනගැනීමට ජනතාව තුල ඇති ස්වභාවික කැමැත්ත සහ මෙතෙක් ෆොන්සේකා මහතාට මාධ්‍යයට ලංවීමට තිබූ අපහසුව මගහැරීම නිසා එතුමාගේ සිතුම් පැතුම් කරලියට පැමිනෙමින් තිබේ. එබැවින් එතුමා ගැන අප තුල කලින් තිබූ ගෞරවය විනාශවෙමින් දැන් පහලවී ඇත්තේ කලකිරීම මුසුවූ ආකල්පයකි. මේ පුද්ගලයා මොනවයින් මොනව කරාවිද යන අවිනිශ්චිතතාවයකි. මේ ඡනාධිපතිවරනයේදී සරත් ෆොන්සේකා මහතාට හෝ ඒ මහතා මාර්ගයෙන් රනිල් වික්‍රමසිංහට හෝ සෝමවංශ අමරසිංහට හෝ බලය ඇල්ලීමට නොහැකිය යන කාරණය ගැන තර්කයක් නැත. සරත් ෆොන්සේකා මහතා ජයග්‍රහනය කරනවායැයි උදම්අනන්නෝ එක්කෝ අවසිහියෙන් දොඩන්නෝය. නැතහොත් පොලවේ පයගසා ජීවත් නොවන්නෝ හෙවත් සාමාන්‍ය ජනතාව සමග නොගැටෙන්නෝය. නැත්නම් තමාට වූ මදිපුංචිකම් ගැන තැවෙන,වර්ජන කර පචවූ කුහකයෝය.
ඔවුන්ගේ SF සිහිනය ගැන අපට රුදාවක් නැත. අපට රුදාව වී ඇත්තේ තිස් වසරක් වන්දිගෙවා මිහිදන් කර අවසන්කල ශාපයේ මිනීවල නැවත ගොඩදමා, අභිමානවත් දේශයක් ලෙස හිස කෙලින් තබාගෙන අප යන ගමන ගැන නොසතුටුව සිටින, සැමදා අප ඔවුනට යටහත් පහත්ව සිටිය යුතුයැයි සිතන, තම ගිලිහී යන බලය පිළිබඳව කලබල වී සිටින බොහෝ බටහිර රටවල් වලට මේ දේශය පාවා දීමට කටයුතු කිරීමයි. අපට රුදාව වී ඇත්තේ ෆොන්සේකා මහතාගේ සැලසුම් ප්‍රායෝගිකව ක්‍රියාවට නැංවූ භුමියේ විරුවන් වූ උසස් හමුදා නිලධාරීන් ප්‍රමුඛ සමස්ථ හමුදාවන්වම ලෝකය ඉදිරියේ අවතක්සේරු කිරීමයි. අපට රුදාව වී ඇත්තේ මහින්ද සමරසිංහ ඇමතිතුමා ප්‍රමුඛ සමස්ථ රජයත්,ලංකාවට හිතවත් බොහෝ රාජ්‍යයන්ද,තානාපතිවරුන් සහ ඒ ඒ රටවල වෙසෙන ශ්‍රී ලාංකිකයන් මහත් වෙහෙසක් දරා ලබාගත් සහතිකය ගඟට කැපූ ඉනි සේ වීනාශ කිරීමයි. අපට රුදාව වී ඇත්තේ නිදහස ලබා ගැනීමට සටන්කල වීරෝධාර සෙන්පතියන්ටත්, සියලු අඩුවැඩිය සහ අවශ්‍ය පසුබිම සකසාදුන්, සැලසුම් සකස්කල, විදේශ බලවේගයන්ට නොනැමී එක ස්ථාවරක කටයුතු කල ආරක්ෂක ලේකම්තුමාටත් එක එකාගේ උසාවි වල සාක්කි දීමට පසුබිම සකස්කිරීම ගැනයි.

"මට පෙර රට" නම් "හැදෙන්නට නොව හදන්නට" නම් මෙවැනි වගකීමකින් තොර ප්‍රකාශ නිකුත්කිරීම නොකල යුතුව තිබුනි. නමුත් එය සිදුවී හමාරය. ඒ එක ප්‍රකාශයට ලෝක ජනමාධ්‍යය කොපමන තැනක් දී ඇද්ද යන්න සහ එසැනින් අදාල පාර්ශව කොපමන ක්‍රියාත්මක වී ඇතිද යන්න අද නිකුත්වූ නිවේදන වලින් මොනවාට පිළිබිඹු වේ. මෙය ඔහු දෙවරක් නොසිතා ද්වේශයෙන් කල ප්‍රකාශයක් නම්, එයින් ඔහු රටට කලේ මහා හානියකි. හමුදාවන්ට අපහාසයකි. LTTE හිතවාදීන්ට ඉල්ලමකි. ඔහු මෙය සිතාමතාම කල ප්‍රකාශයක් නම් එය ඉතා භයානක තත්වයකි. ප්‍රභාකරන්ගේ මරාගෙන මැරෙන ප්‍රහාරයකි. තනිකරම විදේශ කොන්තරාත්තුවක් ඉටුකිරීමකි. එය එසේනම් සරත් ෆොන්සේකා මහතා පරාජය කිරීම අනිවාර්යයෙන්ම කලයුත්තකි.
මහා දේශප්‍රේමීන්යැයි කියාගන්නා ජවිපෙ ද විලි ලැජ්ජා නැතිව ෆොන්සේකා මහතාගේ ප්‍රකාශයේ සැර බාලකිරීමේ උත්සාහයක නිරතව සිටිනු පෙනේ. තිස්ස අල ලුනු පරිප්පු ගැන කියමින් SF මෙහෙයුමේ අසාර්ථකත්වය වැසීමට වලිකමින් සිටී. අභිමානවත් රණවිරුවෙක් ලෙස රටේ සහ සමස්ථ ලෝකයේම ගෞරවයට පාත්‍රවී තම ජීවිතයේ අවසන් කාලය ගතකිරීමට සරත් ෆොන්සේකා මහතාට තිබූ අවස්ථාව රනිල් සහ JVPය නැති කලෝය. යුද්දයට කෙලින්ම අකුල්හෙලූ වික්‍රමසිංහත් වර්ජන කරමින් අනියමින් අකුල්හෙලූ JVPයත් මෙසේ තම පලිය ගත්හ. එක ගලෙන් කුරුල්ලෝ දෙන්නයි කියමින් ෆොන්සේකා මහතා මාර්ගයෙන් මහින්ද රාජපක්ෂ මහතාගෙන්ද ගෝඨාභය රාජපක්ෂ මහතාතගෙන්ද පලිගැනීමට වලිකයි.
දහම්පාසලේදී ඉගෙනගත් අප කවුරුත් දන්නා කතාවක් මෙහිදී සඳහන් කිරීමට කැමැත්තෙමු. සුලඟට ගසාගෙන ගිය ගිරාපැටවු දෙදෙනෙක්, එකෙක් තාපසාරාමයකටද අනෙකා සොරමුලක් ලඟටද වැටිනි. තාපසාරාමයේ හැදුනු එකා හොඳ වචනද, සොරමුල ඇසුරේ හැදුනු එකා නරක වචනද උගත්තෝය. මෙහි ඇත්තේ එක ගිරා පැටියෙකි. ෆොන්සේකා මහතා කලින් හොඳ ඇසුරේ සිට හොඳ වැඩ කලේය. කුමක්දෝ රටේ අවාසනාවකට දැන් සොර මුලකට එකතුවී අතීතයේ සොරමුල ඇසුරේ හැදුනු ගිරා පෝතකයාගේ චරිතයට පනපොවයි.

"අසේවනාච බාලානං"

මීයන් සහ සේලරුවන්

2009-12-07T18:23:00.003+05:30

මීයා යනු මිනිසාට වටා බුද්ධියෙන් අඩු සත්වයෙකි. නැවක යන මීයෝ සැඩ රළ පහරක් නැවට වැදී ඉන් වතුර බිඳක් ඇඟට වැටුන කල මේ නැව ගිලෙන්නේය යන භීතියෙන් ජීවිතාශාවෙන් වහාම නැවෙන් මුහුදට පනිති. ලඟම ඇති නිදහසේ පාවෙන නැවට නගිති. අවාසනාවක මහත, ඒ නැවේ කප්පිත්තෙක් සිටීද නැද්ද, සිටීනම් නැව ගෙනයාමට ඔහුට මොලයක් තිබේද නැද්ද යන්න නොසිතති. මා ගැලවුනා මා ගැලවුනා යැයි මොරදෙති. නමුත් සත්තකින්ම මේ මීයා කර ඇත්තේ කුමක්ද? නියම කප්පිත්තෙක් සිටි, නියමිත අරමුනක් කරා සැඩරල බිඳගෙන ධාවනය වන නැවෙන් නිකරුනේ එලියට පැන නැවේ අයිතිය පමනක් බලාපොරොත්තුවන, නැව ගෙනයාමට නොදන්නා, තම නායකත්වයට අභියෝගයක් විය හැකි දක්ෂ සේලරුවන් නැවෙන් මුහුදට තල්ලු කරන, තකතීරු, කප්පිත්තෙක් පමනක් සිටින සදාකාලිකව මුහුද මැදටම වී සිට දිරාපත්වී ගිලීයන නැවකට ගොඩවීමයි. තව මොහොතක් ගතවනවීට සදා අනාත නැවේ සිටි වැඩක් කල හැකි බොහෝ සේලරුවන් තමාගේ කැමැත්තෙන්ම හෝ තකතීරු කප්පිත්තා නැවෙන් මුහුදට තල්ලුකිරීම නිසා හෝ තමා කලින් සුවසේ ගමන්කල නැවට ගොඩවී දක්ෂ කප්පිත්තෙකුගේ මගපෙන්වීමෙන් ගොඩබිම කරා වේගයෙන් යන බවද මෝඩ මීයාට දක්නට ලැබෙනු ඇත.

සමහර විට මේ මීයන් වෙන අදහසකින් ගියා වෙන්නටද පුලුවන. දක්ෂ කප්පිත්තා නැව පදවන අයුරු බලාහිඳ ආ මේක මොන කඡ්ඡක්දැයි සිතා නැවේ කපිතාන්කම බලාඳපොරොත්ත්‍තුව සිට නොලැබෙන කල සිත්වේදනාවෙන්, හරිහමන් කප්පිත්තෙක් නැති නැවට නැග නායක කම ගැනීමට සිතුවාවන්නටද පුලුවන. නමුත් එයද ලෙහෙසි නොවනු ඇත. තව විසාල මීයෝද ඒ අදහසින්ම එයට ගොඩවී සිටී. වඩා ලොකු කුට්ටියක් සහ තත්වයක් වෙනුවෙන් මීයෝ මෙසේ විනාශයට යති.

නැවෙන් මීයන් පැනීම ගැන සන්තෝසෙන් උඩපැනපු, මේ මී රාමුවෙන් පිට සිටිනායැයි කියන, අරමුනක් කරා යන නැවේ විනාශය බලාපොරොත්තුවන, සදා අනාත නැවේ චක්ගෝල චවු චවු ලා දැන් දත කට පූට්ටු වී කීමට දෙයක් නැතිව තුෂ්නිම්භුතව බලාහිඳිති. ඒ තමන්ගේ මෝඩ කප්පිත්තා නැවෙන් එලියට දාපු සේලරුවන් සුවසේ අනික් නැවට නැගී ගමනාන්තයට යන අයුරු දැකීමෙන් සහ තම නැවේ ඉතිරිව සිටින විවිද අරමුණු සහිත මීයන් දැකීමෙනි.

Picture from - www.megangulick.com

Vista වියෝව

2009-11-07T16:40:00.003+05:30

මේ ඊයෙ පෙරේදා වෙනකම් මම භාවිතා කලේ Windows Vista. ඒකත් Dell පරිඝනකයක් සඳහා ආපු ලියාපදිංචි කල සංස්කරණයක්. Update කිරීම සහ only Genuine Microsoft software සඳහා කිසිම අවහිරයක් තිබුනෙ නැහැ.සතියක පමන කාලයක ඉඳලා මගේ copy එක active කරන්න කියල warning ආවත් ගනන් ගත්තෙ නැහැ. නමුත් හදිසියේම මෙන්න බොලේ මූ කියපි active කරනකම් වැඩකරන්න බෑය කියල. මමත් ගියා active කරන්න. බඩු නේද. License Error. අලුත් ලැයිසොමක් ගන්නලු. එතනින් එහා මොකුත් බෑ. only restart. නැවත ස්ථපනයත් කරල බැලුව. අර බණේමයි. මොනව කරන්නද. Windows 7 evaluation කොපියක් තිබිල දැම්ම. පෙරලුන පිට හොඳයි කියන්න වගේ ඒක නං වැඩ. Vista වලට වඩා හොඳයි වගේ. ඒත් කොයි තරම් කාලෙකටද කියන්න බෑනේ. කඩේ නං Original බඩු තියෙනව. ඒත් ගෙඩිපිටින් ඩොලර් 320ක්.@@#!#$$$.
මොන හිතකින් ගන්නද.
Linux ගැන මීට වඩා සැලකිල්ලක් දැක්වුවානම්..... මොන තරම් අගේද

පැරෑලිය

2009-06-29T14:25:00.004+05:30

අපි ගියා උණවටුනෙ. ඉස්කෝලෙ අප අයත් දශකයේ ආදි ශිෂ්‍ය සමාජය මගින් තමා සංවිධානය කලේ. ඉතාමත් ලස්සන වෙරල තීරයක්.
ඒත් මේ සටහන ඒ ගැන නෙමෙයි. ඒ ගිහිල්ල එනකොට මගදි හම්බවෙනව ප්‍රදේශයක් පැරෑලිය කියල. නම හුරුපුරුදු ඇති නේද? සුනාමි ඛේදවාචකය අමතක නැතිනං මේ නම අමතක වෙන්න විදිහක් නෑ. කෝච්චියේ ගමන්කරපු එක්දහස් දෙසිය ගනනක් සහ ගම්මානයේ 300ක් පමන දෙනා එකවරම ජීවිතාක්ෂයට පත්උන ස්ථානයක් තමයි මෙතන. ඔය පොල්ගස් වලින් වටවෙලා තියෙන තැන එක්දහස් අටසියයක මිනිස් සිරුරු භූමදානය කල සමූහ මිනී වලක් තියෙන තැනක්. එතන කුඩා පෙට්ටි කඩයක් පවත්වගෙන යන අම්ම කෙනෙක් තමා මේ විස්තර කිව්වෙ. ඇගේ පුතත් මේ එක්දහස් අටසියයට අයත්. පලවෙනි රැල්ලට ඈතට ගහගෙන ගිය නිසා ඇගේ ජීවිතය බේරිල තියෙනව. ඒ පැත්තෙ සුනාමියට මරණයක් නොවූ පවුලක් නෑ. ඒ අයගෙන් බොහෝ අයගෙ ජීවිත නැවත ගොඩනැගීමට තාම කිසිවක් නොවූ තරම්.
ජෙයරාජ් ප්‍රනාන්දු පුල්ලෙ හිටපු ඇමතිතුමා ගැනනං ඒ මිනිස්සු බොහොම කෘතඤපූර්වකව කතාකරනව. නිවාස අහිමි වූ බොහෝ පිරිසකට එතුමා නිවාස සාදා දීමට මූලික වී කටයුතු කල බවට පින් දෙනව. නිවාස වල තත්වය සුපිරි නොවුනත් එසේ හෝ ඔවුනට පිලිසරනක් වී ඇත්තේ එතුමා පමණයි.

සෑම වසරකම දෙසැම්බර් 26 වැනිදට මාධ්‍ය ආයතන නං එනවලු කැමරා අටවගෙන නමුත් එයින් ඔවුනට වන සේවයක් නැති බව තමා ඔවුන් ප්‍රකාශ කලේ. ගිය වසරේත් දෙසැම්බර් 26 වෙනිද ලඟම නෑයා වෙන්න ආපු මාධ්‍ය ආයතනයකට ආපහු යන්න පාර කිව්ව බවකුත් මේ විස්තර කියපු අම්ම සඳහන් කලා. තම තමංගේ දේශපාලන අරමුණුවලට ඒ මිනිස්සුන්ගේ අසරණකම විකුනගෙන කන ඔයවගේ නෑයන්ට නං එහෙම තමා කරන්න ඕනි. සෑම වසරකම දෙසැම්බර් 26 වෙනිදට ගමේ සියල්ලන්ගෙම දායකත්වයෙන් මෙම ස්ථානයේ දානයක් දෙනවලු. යට තියෙන්නෙ මියගිය අය සිහිවීමට හදපු ස්මාරකය. එතනදි මේ විස්තර අහද්දි දැනෙන හැඟීම නං විස්තර කරන්න බෑ.

මේ මොන කරුමයක්ද?

2009-06-12T19:26:00.002+05:30

ඔය තියෙන්නෙ අද මට ලැබුනු e-mail පනිවිඩයක්. මීට කලිනුත් මෙවැනි අදහස් සහිතව e-mail ආවත් අපේ mail address එක පාවිච්චි කරල එක එකා සල්ලි හම්බකරන්න හදන බව අමු අමුවෙම කියල එවපු පලමුවෙනි දැන්වීම මේක තමයි. අන්තර්ජාල ව්‍යාප්තියත් මල වදයක් වෙයිද මංද.

පසු සටහන

උඩ තියෙන දැන්වීම මෙන්න අමුවෙන්ම

නානවද...? මෙන්න මරු තැනක්.

2009-06-08T20:34:00.002+05:30

දින කීපයකට කලින් මම ගියා බෙලිහුල්ඔය නිවාඩු නිකේතනයකට. මීට කලිනුත් මේ ස්ථානයට කීප විටක් ගිහින් තියෙනව. මේ ගැන පොඩි සටහනක් ලියන්න කලිනුත් හිතාගෙන හිටියත් අමතක උනා. නමුත් නැවතත් එතනට ගිය නිසා ඔන්න මේ ගමන අමතක වෙන්න කලින් ලිව්ව. ඇත්තෙන්ම ස්වභාවික සෞන්දර්යයෙන් අනූන ස්ථානයක්. බලංගොඩ පහුකරල 10KM විතර යනකොට සුප්‍රසිද්ධ බෙලිහුල් ඔය ආශ්‍රිතව තමා මේ තමා මේ ස්ථානය පිහිටල තියෙන්නෙ. මේ ස්ථානය පෞද්ගලික අංශයට අයත් සංචාරක නිකේතනයක්. නම River Garden. එක පැත්තකින් බෙලිහුල් ඔයට මායිම් වෙනව. නිවාඩු වෙලාවක ගිහිල්ල නාලා කාලා විවේකයක් ගතකරන්න මරු තැන. කැමති ආකාරයක දේශීය/විදේශීය කෑම Restaurant එකෙන් ගන්න පුලුවන්. මිල නං සාමාන්‍යයෙන් ටිකක් ඉහලයි. නමුත් ඉහමොල හූරගෙන කන තරං නං නෙමෙයි. Internet එකේ Search කලොත් තව විස්තර බලන්න පුලුවන්.මේ අවට තවත් මෙවැනි රජයේ සහ පෞද්ගලික අංශයට අයත් සංචාරක නිකේතනයක තියෙනව. හැබැයි මම ගිහින් නෑ. සමහර විට මීටත් වඩා සුන්දර ස්ථාන තියෙන්න පුලුවන්. වෙලාවක ගිහින් බලන්න.

ඇදහීමට නොව නැරඹීමට

2009-05-27T19:03:00.010+05:30

අද හවස මගේ යාලුවෙක්ගේ අවශ්‍යතාවයකට සබරගමු මහ සමන් දේවාලයට ගියා. මීට කලින් ගිහිල්ල තිබුනත් එච්චරම සෙනග නොහිටිය අද තමයි photo ටිකක් ගන්න ලැබුනෙ. ආරක්ෂක හෝ පුරාවිද්‍යාත්මක හෝ හේතුවක් මත දේවාලෙ ඇතුලත නං photo ගන්න එපා කියල හුඟ ඉස්සර ගහපු බෝඩ් ලෑල්ලක් දැකපු නිසා ඒ වැඩේ කරන්න ගියේ නෑ. වර්ථමානයේ දෙවියන් විශ්වාස කිරීම නොකිරීම කෙසේවෙතත් ඒ ඇදහීම් නිසා ඉස්සර මිනිස්සු කොච්චර උසස් කලා නිර්මාණ කරල තියෙනවද. මේ පැත්තෙ යන එන වෙලාවක නරඹලා යන්න කැමතිනං වැඳපුදාගෙන යන්නත් පුලුවන්.

චිරං ජයතු !!!

2009-05-17T19:02:00.003+05:30

සිවු මහ බඹුන්
දුන් විවරනින්
අපටත් රජෙක් පහලව ඇතේ
ඒ මහ රජුන්
පෑ පෙලහරින්
මේ දෙරණ එක්සේසත් කලේ
මේ දෙරණ එක්සේසත් කලේ
ආයුබෝවේවා.. මහ රජානෙනී

යාපා පටුණ උතුරින්
දකුණේ දෙවුන්දර තුඩුවෙන්
නැගුනු දුක් සෝ සුසුම් නිවමින්
සමගි බල මහිමෙන්
දෙස් විදෙස් අභියෝග බිඳහල
මහ රජානෙනී
ආයුබෝවේවා.. මහ රජාණෙනී

නැගෙනහිර අබිමන්
සුපසත් උදානය ගෙන දුන්
උතුරුකරයට වසන්තය දී
දෙරණ දිනු දෙවිඳුන්
දෙස් විදෙස් ඇස් මවිතකරවයි
මහ රජාණෙනී
ආයුබෝවේවා.. මහ රජාණෙනී

සිවු මහ බඹුන්
දුන් විවරනින්
අපටත් රජෙක් පහලව ඇතේ
ඒ මහ රජුන්
පෑ පෙලහරින්
මේ දෙරණ එක්සේසත් කලේ
මේ දෙරණ එක්සේසත් කලේ

ආයුබෝවේවා.. මහ රජාණෙනී
ආයුබෝවේවා.. මහ රජාණෙනී
ආයුබෝවේවා.. මහ රජාණෙනී……….!!!!

(ඡායාරූපය උපුටාගැනීම:-www.bcomart.com)

චිත්‍රපටි - කොටු- කොටු සහ මතට තිත

2009-05-04T22:28:00.001+05:30

සාමාන්‍යයෙන් මම රූපවාහිනී නාලිකාවල යන චිත්‍රපට බලන්නෙ නෑ. ඒත් මේ ලඟදි, මතක හැටියෙට ස්වර්නවාහිනියෙද කොහෙද එක්තරා පැරණි සිංහල චිත්‍රපටියක් විකාශය වෙනව අහම්බෙන් වගෙ දැක්ක. මම ප්‍රියකරන නලුවන් දෙදෙනෙක්ම සිටි නිසා බලන්න කියල වාඩිඋනා. ඒකෙ එක් ජවනිකාවක් ආරම්භ උනා එක් නලුවෙක් දුම් බොන පයිප්පයක් අතේ තියාගෙන ඉන්න දර්ශනයකින්. අර නලුව පයිප්පෙ කටට ගත්ත ගමන් රූපවාහිනී තිරය කොටු කොටු උනා. මම විනාඩි පහක් විතර බලන්හිටිය. කටහඬ විතරයි. කිසිම තේරුමක් නෑ. ඒ චිත්‍රපටියේ බොහෝ දර්ශන ඒ වගේ කොටු කොටු සීන් සෑහෙන්න තිබුනා. අවසානයේ ඒක නරඹන්න මගේ තිබුනු කැමැත්ත නැතිඋනා. මත්ද්‍රව්‍ය සීන් නැතැයි සිතිය හැකි දෙබස් අවස්ථාවල පවා කලින් දාපු කොටු කොටු ඉවත් කරන්න අමතක වෙලාද කොහෙද දිගටම කොටු කොටු තිබුනා.

ඇත්තටම මේක අවශ්‍යය දෙයක්ද. මත්ද්‍රව්‍ය ප්‍රචාරනය වැලැක්වීම අවශ්‍යයි තමා. නමුත් මෙය ඒකට සාර්ථක පිළියමක්ද? සත්තකින්ම මෙයින් වෙන්නෙ එම කලා නිර්මානයට හානිවීම සහ එය නරඹන බාලවයස්කරුවන්ගේ අනවශ්‍ය අවධානයක් එකී දුම්වැටි හෝ මත්පැන් පානය කරන ජවනිකාව සම්බන්ධයෙන් යොමුවීම පමණක් නොවේද? මට මතක හැටියට අප කුඩා කාලයේ නරඹපු එවැනි දර්ශන ගැන විශේෂ අවධානයක් අපට ඇති නොවුනි. ඒ මන්ද යත් මත්පැන්, දුම්වැටි යනුවෙන් දෙයක් සමාජයේ ඇති බව අප දන්නා බැවිනි. ඒවා පාවිච්චි කිරීම නරක දෙයක් බව අපයේ දෙමවුපිය-වැඩිහිටියන්ගෙන් අප දැන සිටියෙමු. මත්පැන් පානයකර පැමිනෙන්නාගේ හැසිරීමෙන් එහි ඇති විනාශකාරී බව දැක්කෙමු. ඉන් වැලකීමට උගත්තෙමු. කොටු දැමීම ගැන කිවහොත්, මත්පැන්-දුම්වැටි ගැන දන්නා දරුවා එහි සිද්ධවන්නේ කුමක්දැයි දනී. එබැවින් එය අසාර්ථකය. මත්පැන්-දුම්වැටි ගැන නොදන්නා දරුවා(එවන් දරුවන් සිටීද යන්න ගැටලුවකි) මේ කොටු දැමීම කුමක්දැයි මව-පියා විමසනු ඇත. එවිට ඒ කුමක්දැයි විස්තර කිරීමට දෙමවුපියන්ට සිදුවනු ඇත. එය මගහැරිය හොත් දරුවාගේ අවධානය වෙසෙසින්ම එයට යොමුවනු ඇත. එබැවින් එයද අසාර්ථකය. එසේනම් කොටු දැමීමේ අර්ථයක් තිබේද?

සත්තකින්ම විය යුත්තේ චිත්‍රපටි හෝ ටෙලිනාට්‍යකරුවන් මත්පැන්-දුම්වැටි ව්‍යාපාරිකයන්ගෙන් නිශ්පාදනය සඳහා මුදල් ලබාගෙන එම මත්පැන්-දුම්වැටි එකී නිර්මානය තුල උලුප්පා දක්වමින් ඊට ප්‍රචාරයක් දීම වැලැක්වීමයි. මත්පැන්-දුම්වැටි වල වෙළද දැන්වීම් ප්‍රචාරණය වැලැක්වීමයි(මා දන්නා පරිදි මෙය සාර්ථකව ක්‍රියාත්මක වේ). මත්පැන්-දුම්වැටි වලින් සමාජයට යහපතක් නොව අයහපතක් වනබව තම නිර්මාණ වලින් පිළිබිඹු වන සේ නිර්මාණකරනයේ යෙදීමට නිර්මාණකරුවා දැනුවත් කිරීමයි. ඒ හැර මෙවැනි කොටු කොටු තුලින් සිදුවන්නේ ඊට අනවශ්‍ය ප්‍රචාරයක් ලබාදීම බව මගේ හැඟීමයි. මතට තිත තැබීමට ගනුලැබූ විවිධ සාර්ථක ක්‍රියාමාර්ග තුල මෙම කොටු කොටු ක්‍රියාමාර්ග අතීසාරයට අමුඩගැසීමක් බව නොකියාම බැරිය.

2009-04-21T08:57:00.002+05:30

ඔන්න බළලා මල්ලෙන් එලියට පැන්නා. ඒ කියන්නෙ ඊයෙ පත්තරේක දැක්ක අර IMF එක ලංකාවට බලෙන් දෙන ණය මුදල දෙන්න නං වහාම සටන් විරාමයකට යන්න කියල ඇමරිකාව කියනවලු. නැත්තං ඒක වලක්වනව කියල කියනවලු. ඔන්න බලමුකො ඒකෙත් හැටි. LTTEය ගැන බටහිර රටවල් වල පුදුම කරුණාවක්නෙ තියෙන්නෙ. මේ යුද්දෙ ඉවර වෙනවට ඒඅය මෙච්චර අකමැති ඇයිද මංද.
UN එක හරහා ප්‍රභාව බේරගන්න පුලුවන් තරම් දඟලලා බැරිතැන දැන් ආධාරවලට කොන්දේසි දාල බලනව එහෙම හරි LTTEය ගොඩගන්න. ඇමරිකාව පැත්ත බලාගෙන කවුරුහරි බැන්නත් පස්සෙන් එලවගෙන ගිහින් ඒ මිනිහගේ රටටම ගහන මේ ප්‍රජාතන්ත්‍රවාදියා ලංකාවෙ අවුරුදු 30ක් තිස්සෙ මිනීමරුපු මේ ඝාතකයා ඉවර කරන්න යනකොට ඒකට හරස්කපනවා. LTTEය අච්චර අහිංසක මිනිස්සු හිරකරන් ඉන්න එක ගැන වරද පටවන්න යන්නෙ ඒඅය බේරගන්න යන නීත්‍යානුකුල රජයට. පුදුම අර්ථ දැක්වීමක්නෙ. බලපුවහම අපේ මහදැනමුත්ත ඔයිට වඩා හොඳට ප්‍රශ්ණ විසඳුව. ඔබාමට තේරෙනවනං, සිංහල කියුමන් තියෙනව ඒ අයට හොඳට ගැලපෙන.
කකුලුව හරහට යන ගමන් අනික් උන්ට කියනවලු කෙලින පලයං කියල. ඉස්ස ඔලුවෙ ජරාව තියාගෙන කියනවලු මම සුදනා කියල. මේ ආදී වශයෙන්...
බලපුවහම බලයට ඇති කෑදරකම ලංකාවට විතරක් උරුම වෙච්චි දෙයක් නෙමෙයි. අපේ අය එලිපිට දඟලනව. සුදු මහත්තුරු (දැන් කලු මහත්තුරුත්) හීන් නූලෙන් දඟලනව.

අපරාදේ මැරතන්

2009-04-17T20:14:00.000+05:30

අද මැරතන් බව දැනුයි දන්නෙ. චැක්! මමත් දුවන්ඩ ඉල්ලුම් පත්තරයක් දැම්මා. ඒත් පරක්කුයි වගේ.

බිඳින් ලෙන් දොරේ බලේ...!!!

2009-04-10T19:33:00.009+05:30

බඹර රාව නැංවෙනා අඳුරු ලෙනතුලේ...

මල් පිපී රොනින්පිරී සුරත්කුසුම්කුලේ....

තටුකඩා දැමූ බිඟුන් එයි පෙලින් පෙලේ...
සිංහබා පුතුනි බිඳින් ලෙන් දොරේ බලේ...!!!

මාධ්‍ය නිදහස

2009-03-16T17:55:00.003+05:30

මහිංද විජේසේකර ඇමතිවරයා ජාතික රෝහලට රැගෙන ආ අවස්ථාවේ මාධ්‍යකරුවන්ගේ හැසිරීම ගැන මගේ අප්‍රසාදය පලකිරීමට මේ සටහන ලියමි. එම අවස්ථාවේ රෝගියාව වහා රෝහලට ගෙනයාම අවුරමින් රස කෑමකට වහවැටුණ කපුටු රැලක් මෙන් හැසිරීම කිසිම මාධ්‍ය සදාචාරයකට අනුගත වේ යැයි මම නොසිතමි. ඇත්තෙන්ම ඒ අවස්ථාවේ සිටි පොලිස් නිලධාරීන් එය මර්දනය කිරීමට ගියානම් පසුදා මේ මිනී කාක්කන් රජයේ මාධ්‍ය මර්දනය යනුවෙන් ලිප්ටන් වටරවුම, කොටුව දුම්රිය පොල දෙවනත් කිරීමටද බොහෝ ඉඩ තිබිනි. මේ අසික්කිත වැඩ මාධ්‍ය නිදහසද?
ඇත්තෙන්ම මෙහි ඉන්නට තිබුනේ විජේසේකර ඇමතිවරයා නොව මර්වින් සිල්වා ඇමතිවරයායි. එසේනම් එවෙලේම හෝ පසුව හෝ මෙවැනි පහත් වැඩ නොකිරීමට උන්ටම ගැලපෙන බාසාවකින් මේ මිනී කාක්කන් පාඩමක් ඉගෙනගනු ඇත.

සදාතනික සත්‍යය

2009-02-19T22:59:00.002+05:30

සුන්දරත්වය සමග ඇති අනිත්‍යය වටහාගන්නට ජීවිතයේ පළමු පාඩම.

බැටලු සම ඉරී ඇත.

2009-02-16T21:18:00.003+05:30

සිය දර්ශනයට අනුව, නැතහොත් තම ස්වාමියාගේ අවශ්‍යතාවය අනුව ශ්‍රී ලාංකික අශිෂ්ඨ, ජාතිවාදී ජනයා ශිෂ්ඨසම්පන්න, ප්‍රජාතන්ත්‍රවාදී කිරීමට මහත් වෙහෙසක් ගත් මහා මානවහිතවාදි බ්ලොග්කරුවා ඡන්දයෙන් පසු බොහෝම හේබා ගිය බවක් පෙනේ. රජයේ හමුදා ත්‍රස්තවාදීන්ට දුවන්නට පහරදෙනවිට මුන්නැහැගේ ප්‍රජාතන්ත්‍රවාදී, මානවහිතවාදි මනසට දරාගත නොහැකිවිය. ඒ හමුදාවට නායකත්වය දෙන ආරක්ෂක ලේකම්තුමා සහ ජනාධිපතිතුමා මෙතුමාට නයාට අඳුකොල මෙන් විය. ඉතා බර වචන යොදාගනිමින්, කෙස් පැලෙන තර්ක දමමින් මෙතුමා දෙමළ ජනතාවට විමුක්තිය ලබාදීමට වලිකෑවේය. බහුතරය ජනපති මහින්දට විරුද්ධ බවට මහප්‍රාණ බ්ලොග් ලිව්වේය.
නමුත් සත්‍ය කුමක්ද? නිහඬව උන්නැහැගෙ රට පාවාදීමේ මතය අනුමතකරන මහා පිරිසක් ඉන්න බවට කැගැසුවද රටේ ජනතාවගෙන් සාධාරන නියැදියක් බඳු වයඹ සහ මධ්‍යම පලාත් වලදි ලංකාවේ බහුතරය මහින්ද සමග බව ඔප්පු විය.
ජනතාව පොදු පෙරමුනට ඡන්දය දුන්නේ මෙම පලාත්සභා වල ඇති කාර්යක්ෂමතාවයට හෝ අපේක්ෂකයන්ගේ අවංකභාවයට නොව(සියල්ලෝම හොරු නොවෙති) සහ එජාපයෙන්/ජවිපෙන් ඉදිරිපත් වු අපේක්ෂකයන්ගේ වැරදි නිසා(සියල්ලෝම සත්පුරුෂයෝ නොවෙති) හෝ නොව රජයේ හා ජනපති මහින්දගේ ත්‍රස්තවාදී මර්ධනය කිරීමේ ප්‍රතිපත්තියට බව කාට වුවත් වැටහේ. බහුතර දෙමළ ජන නියෝජනයක් සහිත මැතිවරන කොට්ඨාශ වල පවා රජය ජයග්‍රහනය කිරීමෙන් පෙනීයන්නේ මෙකී මානවහිතවාදියා තරම් දෙමළ ජනතාව ගැන කැක්කුමක් ඔවුන්ටද නැති බවයි.

මේ ජන්ද ප්‍රතිඵල උන්නැහැට දරාගැනීමට නොහැකිතරම් වගෙ. උන්නැහැගේ ශිෂ්ඨසම්පන්න පිරුවටයට යටින් තියෙන කුහක, බෞද්ධ විරෝධී නිරුවත වෙන කවරදාකවත් නැති විදිහට ප්‍රදර්ශනය වෙන්න පටන් අරන්. සීමාව කොතනද යන්න පවා තෝරාබේරා ගත නොහැකි තමටම මෙතුමා කලබල වෙලා. එතුමගෙ මහප්‍රාන තර්ක අමතකවෙලා වගෙ. උන්නැහැ දැන් ජන්දය දිනූ පසු මිනිස්සු රතිඤ්ඤා පත්තු නොකලේ මන්ද, රජයේ හමුදාවල සහයට මංතර ගුරුකම්කරුවන් කැඳවීම වැනි බොලඳ විහිලු සපයන්නෙක් වෙලා. කොටින්ම රනිල් මහත්තයට අන්ත විකටයෙක් වෙලා.
නමුත් ඒ විහිලුවට යටින් නැවතත් මහා සංඝරත්නය උපහාසයට ලක්කිරීමකුත් කරගෙන යනව. ඒ යන යකා කොරහත් බිඳගෙන යන න්‍යාය ක්‍රියාත්මක කිරීමට බව හොඳින්ම පැහැදිලි. වෙනදා බොහෝම සියුම්ව ලංකාවේ බුදුදහම ගැන ජනතාව කලකිරවීමට කටයුතු කල මෙතුමා දැන් ඉවක් බවක් නැතුව මඩ ගහනව.
උන්නැහැගේ ජනතාව ජාතිවාදයෙන් මුදවාගෙන ශිෂ්ඨ කිරීමේ මෙහෙයුමේ ප්‍රධාන අරමුණු 2න් එකක් වු කොටියාට රටෙන් කෑල්ලක් පූජාකිරීම කොහෙත්ම ඉටු නොවන බවට පසක්වීමෙන් පසු අනෙක් අරමුණවත් ඉටුකරගැනීමට තමා මේ සංඝරත්නය උපහාසයට ලක් කරන්නෙ.

අපේ රටේ භික්ෂුන්වහන්සේලා අවශ්‍ය වුවහොත් සිවුරහැර රණබිමට වුවද පැමිනෙන බව අමුතුවෙන් කිවයුතු නොවේ. එය මේ කලු සුද්දාට අරුමයක් වුවද හරිහමන් ජාතියක් ජන්මයක් ඇති ශ්‍රී ලාංකිකයාට අරුමයක් නොවේ.

කපන්න බැරි අත ඉඹීම හෙවත් නායකතුමා සහ ඇමතිතුමාගේ අලුත් දැක්ම.

2009-01-30T20:57:00.000+05:30

දැන් අපේ රණවිරුවො ලංකාව ත්‍රස්තවාදීන්ගෙන් බේරාගැනීමේ ජයග්‍රාහී සටනේ අවසන් අදියරේ. කවුරු මොනව කිව්වත් ඒකට ලේ,කඳුලු,දාඩිය හෙලපු ත්‍රිවිද හමුදාවට වගේම ජාත්‍යන්තර බලපෑම් වලට යට නොවී අවංකවම සටනට සහය දුන් ආරක්ෂක ලේකම්තුමාටත්, ජනාධිපතිතුමාටත් ශ්‍රී ලංකාවාසීන්ගෙ ගෞරවය හිමිවිය යුතුයි.

ඒත් මෙන්න බොලේ මෙතෙක් කල් දොස්තර හොඳහිත කාටුන් එකේ චවු-චවු වගේ ඕක හරියන්නෑ කිය කිය හිටපු නායකතුමා, කැලෑවක් ඇල්ලුවාය කියපු නායකතුමා, යුද්ධ කරනඑක ඕනිම මෝඩයෙකුට කරන්න පුලුවන්ය කියලා තමංගෙ පට්ටියෙ වැස්සියෙක් තප්පුලනකං කරබාගෙන හිටපු නායකතුමා, එකපාරටම කියනවා රණවිරුවන්ගෙ කාර්ය්‍ය අගේකරනවාය, තව පොඩ්ඩයිය ඒ ටිකත් යමුය, සහයෝගෙ දෙනවාය කියල. හැබෑටම මොකද උන්නැහැට එකපාරටම උනේ. දැං ඉතිං එහෙම නොකිය වෙන මොනව කියන්නද. හෝන් ගහල, වලං බිඳල, පොලේ ගිහිල්ල, වැඩවර්ජන කරල පුලුවන් තරං යුද්දෙ නවත්තන්න උත්සහ කරල බැරි තැන දැන් ජාම බේරගන්න හමුදාව අගේ කරන්න යනව. මොකද එතුම දන්නව හමුදාව නින්දා කරපු විදිහට යුද්දෙ ඉවර වුන ගමන් එතුමගෙ නායකකමත් ඉවරවෙනව කියල. නායක කම කෙසේ වෙතත් රෙද්දක් ඇඳල පාරට බහින්නවත් ඕනි නිසා දැං ඉතිං පෙරලුනපිට හොඳයි නොකිය වෙන මොනව කියන්නද.

ඒත් එක්කම යුද්ධ කරල ත්‍රස්තවාදීන් මට්ටු කරන්න බැරිය, සාමයෙන්ම ත්‍රස්තවාදීන්ව මට්ටු කරමුය, කොච්චර ගැහුවත් ගුටිකකා සාකච්ඡා කරමුය කියල යුධ විරෝධි සාමසංධානයක් ගොඩනාගෙන හිටපු, රැස්වීම් තියපු නියෝජ්‍ය ඇමතිතුමෙකුත් මේ ලඟදි කියනව ඇහුන දැන් තමයිලු යාපනයේ දෙමළ ජනතාවට නිදහස උදාකරන්න පුලුවන්. ඒක තේරූම්ගන්න ඇමතිතුමාට හමුදාව ත්‍රස්තවාදීන්ට දුවන්න ගහනකන්ම ඉන්න උනා. දැන් එතුමගෙ සංවිධානනෙට මොනව කරන්නද මංද. කොහොම හරි ඕං බලන්නකො මිනිස්සුංගෙ සිතුවිලි වෙනස්වෙන හැටි.

කවුරු කොහොම කනපිට ගැහුවත් අපේ රණවිරුවන්ට ජය වේවා.

2009-01-25T20:19:00.000+05:30

ශ්‍රී ලංකාව යලි එක්සේසත් කරමින් විජයග්‍රාහී ගමනක යෙදෙන වීරෝධාර රණවිරුවන්ට මගේ මුලු හදින්ම නැගෙන උත්තමාචාරය.

අතපසු වු යුතුකම.

2009-01-24T16:45:00.000+05:30

ඇත්තටම මම මේ සිංහලෙන් blog සටහන් ලිවීම සහ blog පිටුවක් පවත්වාගෙන යාම ගැන මෙලෝහසරක් දැනගෙන හිටියෙ නැහැ මේ මෑතක් වෙනකන්ම. නමුත් දවසක් Facebook අඩවියේ පලකරපු සිංහල බ්ලොග් දැන්වීමක් අනුව තමයි ඉස්සෙල්ලම සිංහල බ්ලොග් සටහනකට ගියේ. ඒ රුක්ෂාන් කොත්වල සහෘදයාගේ
සිංහල බ්ලොග් - රුක්ෂාන්ගේ බ්ලොග් සටහන කියන blog පිටුව. ඉතිං ඒ blog සටහනින් blog ලිවීම සහ පවත්වාගෙන යාම ගැන ඉතාම හොඳ විස්තරයක් සපයල තිබුන. ඒ සටහන නිසාම
තමයි මම මේ blog ලිවීම ගැන උනන්දුවෙන් සොයාබැලුවෙ සහ දැන් blog සටහනක් පවත්වාගෙන යන්නෙ.
ඒත් එක්කම මේ blog කලාව කෙතරම් ප්‍රබල සහ වැදගත් සන්නිවේදන මාධ්‍යයක්ද කියල දැන් මට හොඳට වැටහෙනව.
ඒවැනි වැදගත් දෙයක් ඉගෙනීමට මාව යොමුකරපු රුක්ෂාන් කොත්වල සහෘදයාට මම මුලින්ම ස්තුති කල යුතුව තිබූ නමුත් මට එය අතපසුවුනා. එය මගෙන් සිදුවු ලොකු වරදක්. වැරදි කල බොහෝ අය කියනපරිදි වැරදීම මනුෂ්‍ය ගතියකි සමාව දීම දේව ගතියකි ලෙස සලකා blog සටහන්කරනයට මාව හඳුන්වා දුන් රුක්ෂාන් කොත්වල සහෘදයාට මාගෙන් පිදෙන ස්තුතිය පිලිගන්වන්නට මෙම සටහන තබමි.

ඉතිං අපි කෑගහමු

2009-01-23T20:09:00.000+05:30

ඕං තවත් මාධ්‍යවේදියෙකුට මැර ප්‍රහාරයක්.
ඉස්සෙල්ලම සිරසට දෙවනුව ලසන්තට තෙවනුව උපාලි තෙන්නකෝන් මහතාට.කවුරු මොන අරමුනකින්ද පහරදීල තියෙන්නේ කියන එකනම් හොඳටම පැහැදිලියි.
ඔවුන්ට අව්‍යශ්‍ය පරිදිම
ඉතිං අපි කෑගහමු.මෙන්න මේ ආන්ඩුව මාධ්‍යවේදීන්ට පහරදෙනවෝ!!!
ඒත් මේ යුද්ධයක් යන අතරතුර, ජනතාව ආන්ඩුව ගැන සුභවාදීව බලන අවස්ථාවක, ඡන්දෙකුත් අතලඟ තියෙද්දි, පිට රටවල් ලංකාවට සහයෝගය දෙන අවස්ථාවක ආන්ඩුව මොකටද මාධ්‍යවේදින්ව හොය හොය ගහන්නෙ. නම කැත කරගන්නෙ?

හේතුවක් නැත්තං හේතුවක් හදල අපි කෑගහමු.

මාධ්‍ය නිදහස නැතිවෙලෝ!!! ඒත් එක්කම යන තවත් ආකර්ශණීය සටන් පාඨ තියෙනව. ඒවත් පාවිච්චි කරමු. මානව හිමිකම් කඩවෙනවෝ! උතුරේ හමුදා මෙහෙයුම් මගින් ඒ ජනතාවගේ මානව හිමිකම් නැතිවෙලෝ!
අත්‍යාවශ්‍ය ද්‍රව්‍ය මොකවත් නැතෝ (ඒවා LTTE ත්‍රස්තවාදීන් හොරාකෑම වෙනම කතාවකි)

මොන දහංගැටයක් ගහල හරි ආන්ඩුව වට්ටමු. පිට රටවල ලංකාවේ නම කැතකරමු. ලංකාවට දෙන ආධාර නවත්වමු. මෙරට ජනතාව යුද්ධය ගැන දක්වන සුභවාදී ආකල්පය බිඳිමු.ඒමගින් රට ත්‍රස්තවාදීන්ගෙන් බේරාගැනීමේ ජයග්‍රාහී ගමන අඩපන කරමු. මිය යාමට පන අදිමින් සිටින LTTE ත්‍රස්තයන් අවසන් මොහොතේ හෝ ගොඩගැනීමට දඟලමු.

අපේ ඉස්කෝලෙට ගිය රණවිරු අයියා

2009-01-15T12:49:00.001+05:30

මවු බිමේ නිදහස වෙනුවෙන් දිවිදුන් කර්නල් නලින්ද කුමාරසිංහ අභීත රණ ශූරයානෙනි,

ජාතියක අභිමානය මුදලට විකිනීමට වෙර දරන්න්ගේ සමාජයක, එයට එරෙහිවන සුජාත දේශප්‍රේමීන් හා එක්ව මවු බිමේ ඒකීයත්වය වෙනුවෙන් සටන්කොට රුදුරු ත්‍රස්තවාදී වෙඩි උණ්ඩයට ලය පෑ ඔබගැන මෙසේ සටහනක් තැබීමට සිත්විය.

ඔබ අප පෙදෙසෙහි බව බව අප කියන්නේ ආඩම්බරයෙනි. ඔබ අප එකම පාසැලේ බව අප කියන්නේ ආඩම්බරයෙනි. ඒ ඔබ ලංකා මාතාවගේ ශ්‍රේෂ්ඨ පුතෙකු වන නිසාවෙනි. ඔබ අපට පමණක් නොව මුලු රටටම අභිමානයකි.
මිනීමරු ත්‍රස්තවාදය මෙරටින් අතුගෑවීයන නුදුරු දිනකදී, ඒ මහා මෙහෙවරට ලේ, කඳුලු, දහදියෙන් පමණක් නොව ජීවිතයෙන්ද දායක වු ඔබ වැනි ජාතියේ පුතුන්ට මුලුමහත් ලංකාතලයම දණ නමා ආචාර කරනු ඇත.
ජාතික වීරයෝ කිසිදා නොමියෙති. ඔවුන් සැමදා හදවත් තුල ජීවමානයි.

දයාබර සොයුර,

සසර වසන තුරු
නිවන් දකින තුරු
පින්කෙත හෙළ රන් දෙරණේ
යලි උපදින්නට
හේතු වාසනා වේවා
හේතු වාසනා වේවා !!!

රත්නපුරෙන් අලුත් හඬක්

2009-01-12T21:12:00.000+05:30

ඔන්න මමත් බ්ලොග් එකට සෙට් උනා.